BFI | UTTANRÍKIS- OG VINNUMÁLARÁÐIÐ | Protokollir um fiskavørur undirritaðar í Beijing

Mánadagin vórðu heilsufrøðiligu protokollirnar um vilt veiddan fisk og fiskalýsi og -mjøl undirritaðar í Beijing. Undirritanin av hesum protokollum tryggjar, at marknaðaratgongdin til Kina verður víðkað til fleiri vørusløg enn áður.

Áðrenn undirritanina, var fundur millum landsstýriskvinnuna í uttanríkis- og vinnumálum og kinverska vararáðharran, Zhao Zenglian. Á fundinum fegnaðust báðir partar um góða samstarvið millum heilsumyndugleikarnar í londunum báðum og umrøddu týdningin, ið hesar protokollir hava fyri at menna handilsviðurskiftini millum Føroyar og Kina.

Tað er týdningarmikið, at føroyska útflutningvinnan fær betri atgongd til fleiri marknaðir fyri at tryggja, at okkara útflutningur ikki gerst ov sárbærur fyri broytingum á heimsmarknaðinum. Tí hava protokollir sum hesar týdning og eg eri sera fegin um, at hendan undirritanin kom í lag, sigur Sirið Stenberg, landsstýriskvinna í uttanríkis- og vinnumálum.

Týsdagin hittir landsstýriskvinnan varauttanríkisráðfrúina, Hua Chunying.

(Myndir 📸 UVMR)

Tíðindabræv

Trýst á knøttin og melda teg til okkara tíðindabræv