Oct 27, 20211 min read

TÓRSHAVNAR KOMMUNA | Skulu viðgera stuðul upp á hálva millión til Rescue Lív

Updated: Oct 28, 2021

Tórshavnar býrað skal í annaðkvøld viðgera uppskotið. Hetta skal millum annað brúkast til at skifta fendaran, dagføra brúnna og í næstum verða gomlu motorarnir eisini skiftir.

(Mynd 📸 Ólavur Frederiksen / Faroephoto)

Á skránni fyri býráðsfundin í Tórshavnar býráði í annaðkvøld, er millum annað eitt mál um stuðul til Rescue Lív.

Seinastu tvey árini hevur Tórshavnar Kommuna stuðlað Rescue Lív. Hetta er bjargingarbáturin hjá sjálvbodna felagsskapinum Havnar Bjargingarfelag. Báturin hevur verið ein týdningarmikil liður í tilbúgvingini í Tórshavnar Kommunu, og hevur havt uppgávur bæði innan bjarging, sjúkraflutning, eldsløkking, v.m.

Verður málið samtykt á komandi býráðsfundi, fer kommunan eisini tvey tey næstu árini at stuðla Havnar Bjargingarfelag.

Stuðulin verður sambært uppskotinum 500.000 kr. um árið komandi tvey árini. Hetta skal brúkast til fyrstu partarnar av teimum uppstigingunum sum Rescue Lív hevur fyri neyðini. Talan er um at skifta fendaran, at dagføra brúnna m.a. við nýggjum navigasjóns-tólum, og at dagføra EL-innleggingar. Í næstum verða eisini gomlu motorarnir skiftir.

Í september samtykti tilbúgvingarnevndin at kommunan framhaldandi skal stuðla Havnar Bjargingarfelag, og í oktober tók Fíggjarnevndin undir við samtyktini.

Málið kemur fyri á Býráðsfundinum í annaðkvøld.

Tíðindabræv

Trýst á knøttin og melda teg til okkara tíðindabræv